امریکا ١٧ کاله مخکې د بشر د حقوقو له شورا وتلې ده

تبصره

که حقيقت ته نظر وکړل شي، امريکا هر وخت د بشر حقوق تر پښو لاندې کړي دي. هغه وخت چې لا د بشر د حقوقو شورا جوړه هم نه وه، امريکا پر هيروشیما او ناګاساکي اتومي بمونه وغورځول او د بشر حقوق څه چې بشريت یې په اور کې وسوځاوه.

 د ملګرو ملتونو د بشر د حقوقو په شورا کې چې امريکا د غړيتوب کومه دعوه کوله هغه تش په نامه دعوه وه. تر ناګاساکي او هیروشیما وروسته یې په نړۍ کې په ميليونونو انسانان د جګړو په اورکې وسوځول؛ له ١٧ کلونو راهيسې یې افغانستان، عراق او سوريه د اوسېدونکو لپاره دوزخ ګرځولې ده.

تېره ورځ په ملګرو ملتونو کې د امریکا سفیرې، نیکي هیلي، د ملګرو ملتونو د بشر د حقوقو له شورا څخه د وتلو پرېکړه په داسې حال کې د واشنګټن په یوه خبري کنفرانس کې اعلان کړه چې د امريکا د بهرنيو چارو نوی وزير، مايک پمپيو، یې هم تر څنګ ولاړ و.

 نیکي هیلي ويل چې امريکا د ايران د اټومي مسئلې پر سر د ملګرو ملتونو د بشر د حقوقو له شورا ووتله.

نيکې هیلې وويل امریکا ځکه له دې شورا ووتله چې ايران له حکومت سره د مخالفت له امله سلګونه وګړي نيولي دي او، د هيلې په خبره، وژلي یې دي، خو د ملګرو ملتونو د بشر د حقوقو شورا پرې هيڅ غوږ نه دى ګرولی.

د امريکا لپاره د نيکي هيلي خبره پر ځای ده. نيکي هيلې هغه څه وايي کوم چې امريکا ته ګټه رسوي.

 که د هيلي خبره ټينګه کړو، بايد د ملګرو ملتونو د بشر د حقوقو له شورا ټول غړي ووځي ځکه امريکا چې په نړۍ، او په ځانګړې توګه په اسلامي هېوادونو کې، کوم اور بل کړی دى او هره ورځ  د امريکا لخوا په پیل کړل شویو جګړو کې انسانان وژل کېږي د بشر د حقوقو ادارې پرې يوه ورځ هم غوږ نه دی ګرځولی. بايد د نيکي هيلې خبره عملي کړل شي او د بشر د حقوقو له شورا ټول غړي هېوادونه ووځي.‌

امريکايي  چارواکي په دې عقيده دي چې د بشر د حقوقو شورا له اسراییلو سره سم چلند نه کوي. د بشر د حقوقو شورا چې په فلسطين کې د اسریيلو پر وحشت او ظلمونو کومې سترګې پټې کړې دي د يوه هېواد پر وحشت یې هم نه دې پټې کړې. او داسي هم نه شي کېداى چې اسرایيل دې هره ورځ په غزه کې مسلمانان په اور کې سوځوي او د بشر د حقوقو شورا دې چوپه خوله ناسته وي.

د ملګرو ملتونو د سرمنشي، انتونیو ګوتیریش، ویاند د دې پرېکړې په غبرګون کې ویلي: امریکا بايد د بشر حقونو په  شورا کې پاتې شي.

 دا د ګوتيريش خپل نظر دى، خو د بشر د حقوقو په شورا کې د امريکا پاتې کېدل ګټه نه لري، ځکه چې امريکا تل بشر په اور کې سوځولى دی، حقوقو ته یې نه دی پريښی. د امريکا لپاره د ګوتيريش غوښتنه ګټه نه لري او نه امريکا د بشر د حقوقو درناوى کوي.

امريکا په افغانستان کې د بشر د حقوقو نوم هم د افغانانو له ياده وويست. دومره وحشت او ظلمونه یې وکړل چې په ځنګل کې به یې يو وحشي له بل وحشي سره هم ونه کړي.

 په افغانستان او نړۍ کې د امريکا وحشت او ظلمونو وښوده چې نوره امريکا د ملګرو ملتونو د بشر د حقوقو په شورا کې د پاتې کېدو نه ده ځکه د ټرمپ ادارې ترې د وتلو پرېکړه وکړه. او ډېر ښه پريکړه یې وکړه، د بشر د حقوقو په شورا کې هغه هېوادونه پاتې کېږي چې په بشريت عقيده ولري، له وحشيانو بايد د بشر حقوق ونه غوښتل شي.

 د ټرمپ ادارې اوس د نيکي هيلي په خوله اعلان وکړ، په حقيقت کې امريکا ١٧ کلونه پخوا لا چې پر افغانستان، او نورو هېوادونو کې یې پوځي مداخلې وکړې، د بشر حقوق له منځه یووړل او له دې شورا یې ځان وتلی حساب کړی دی.

سرچینه: کابل ټکی کام

x

Check Also

امریکا پر چین بندیزونه لګولي دي

امریکا له روسیې د پوځي الوتکو او له ځمکې هوا ته ویشتل ...