د ارګ خبرپاڼه

جمهوررئیس غني د هند لومړي وزیر سره وکتل

د افغانستان د اسلامي جمهوریت جمهوررئیس محمداشرف غني ته نن له غرمې مخکې د پلازمېنه نوي ډیلي حیدراباد ماڼۍ کې د هند لومړي وزیر نریندرا مودي تود هرکلی ووایه او له جمهور رئیس څخه یې د بلنې د منلو او هند ته د رسمي سفر له امله مننه وکړه.

د هېواد جمهوررئیس د هند د لومړي وزیر د رسمي بلنې او د دغه هېواد د خلکو مېلمه پالنې څخه په مننې د افغانستان د خلکو او حکومت په استازیتوب په هند کې د وروستیو سېلابونو د اوښتو زیانونو له امله غمشریکي وکړه. هغه وویل: د افغانستان او هند دوستانه مناسبات او دوه اړخیزې همکارۍ ورځ تر بلې پراخېدونکې دي.

د دواړو هېوادونو مشرانو د افغانستان او هند د دوستانه اړیکو او دوه اړخیزه همکاریو د لا پراختیا، تروریزم سره د ګډې مبارزې او د افغانستان او هند ترمنځ د اقتصادي او ترانزیټي همکاریو د پراختیا، سیمه ییز اتصال، د افغانستان – هند هوايي دهلیز د انکشاف، د لوړو، حرفوي او پر لیکه (انلاین)زده کړو او همدارنګه د افغانستان بېلابېلو سکتورونو کې د ګډې پانګونې په اړه بحث او خبرې وکړې.

د هند لومړي وزیر وویل، هېواد یې د شاه توت بند او کانالونو جوړولو، د لمریزې برېښنا او واټرپمپونو، د څښاک اوبو او د کلیو په کچه ۱۶۰ بېلابېلو پروژو، د ټرانسپورټي سیستم، ۳۵۰ښاري ملي بسونو د ترمیم او د یو زر نویو ملي بسونو د ورکړې، د غذایي توکو د پروسس او نورو بېلابېلو برخو کې د افغانستان حکومت او خلکو سره هر ډول مالي او تخنیکي همکارۍ ته چمتو دی او پر دې توافق وشو چې د دواړو هېوادونو تخنیکي ټيمونه دې ژر تر ژره د عملي کار د پیلولو زمینه برابره کړي.

په دغه کتنه کې جمهور رئیس غني او لومړي وزیر مودي پر دې توافق وکړ چې د افغانستان او هند تر منځ د هوایي کوریډور د انکشاف په موخه دې د الوتنو شمېر زیاتاو همدارنګه دې د هرات او امرتسر په ګډون نورو ښارونو ته هم دغه الوتنې پیل شي. دواړو مشرانو په دې هم توافق وکړ چې د قېمتي ډبرو د پروسس، صادرولو او د درملو د تولید په موخه دې د افغانستان او هند تخنیکي ټیمونه په ګډه کار وکړي.

نوموړي زیاته کړه، له افغانستان سره د تحصیلي بورسونو د همکارۍ پروګرام یې پنځه کاله نور هم غځولی او ترڅنګ به یې افغان مامورین هم د بېلابېلو مهارتونو د زده کړې په برخه کې وروزي. هغه زیاته کړه، په نږدې راتلونکي کې به د هند د بهرنیو چارو وزیره افغانستان ته سفر وکړي او له افغان لوري سره به د هند او افغانستان د ستراتیژیکو اړیکو په اړه بحث او خبرې وکړي.

محمد اشرف غني د هند په ممبي کې د افغان او هند تر منځ د سوداګرۍ او پانګونې ګډ نندارتون د دواړو هېوادونو د اقتصادي ودې لپاره ګټور وباله. جمهور رئیس غني له افغانستان سره په بېلابېلو په ځانګړي ډول د زیربنایي پروژو د تطبیق په برخه کې د هند د همکاریو قدردانۍ وکړه. هغه زیاته کړه، د هند ارزښتناکې مرستې به د افغانانو په ژوند کې د مثبت بدلون او هوساینې لامل شي

سرچینه - د جمهوري ریاست دفتر - ارګ

x

Check Also

څوارلس ایراني عسکر تښتول شوي دي

(کابل ټکی کام، ۱۳۹۷، تله ۲۴) د ایراني رسنيو د راپورونو له ...