خبرپاڼې

په هلمندکې د عبدالجبار قهرمان د ټاکنیز کمپاین پر دفتر د تررویستي برید په اړه مطبوعاتي اعلامیه

د ارګ خبرپاڼه

ارګ، کابل: د افغانستان دښمنانو د هلمند ولایت په  مرکز لښکرګاه کې نن د ولسي جرګې د نوماند عبدالجبار قهرمان پر ټاکنیز دفتر د تروریستيبرید په پایله کې قهرمان  شهید او یو شمېر هېوادوال ټپیان کړل.

جمهوررئیس غني د دغه تروریستي برید د غندنې پرمهال وویل، شهید قهرمان د افغانستان صادق او زړور بچی و چې تل یې د هېواد د ابادۍ او د ولس د سوکالۍ ملي فکر او نه ستړې کېدونکې هڅې کولې. تروریستان او د دوی ملاتړي د وحشيانه بریدونو په ترسره کولو سره  د ټاکنو په سوله ییز، ملي او ولسواک بهیر  زموږ د خلکو باور نشي کمزوری کولی.

جمهوررئیس مسوولینو ته د شهید عبدالجبار قهرمان د ټاکنیز کمپاین په دفتر کې د رامنځته شوې پېښې د هر اړخیزې څېړنې، د عاملینو د مجازات او د  ټاکنیزو کمپاینونو د غونډو د لا ښه امنیت لارښوونه وکړه.

جمهوررئیس محمد اشرف غني د شهید قهرمان کورنۍ ته د تسلیت ترڅنګ نوموړي ته د خدای تعالی په دربار کې د فردوس جنت او ټپیانو ته د بشپړې روغتیا دعا کوي.

سرچینه - د جمهوري ریاست دفتر - ارګ