نظر او تحلیل

د هیواد پر پوځي وضعیت، د جنرال رازق د وژل کیدو اغیز

نن ټکی اسیا – سرلیکنه
وړمه ورځ په هلمند کې د جبار قهرمان تر وژلو وروسته پرون طالبانو د یوې رسمي اعلامیې په ترڅ کې د کندهار امنیه قومندان مل پاسوال جنرال رازق د وژلو اعلان وکړ.

جنرال رازق خان د هیواد په لویدیځه حوزه کې د طالبانو په وړاندې تر ټولو غښتلی او ځواکمن پوځي قومندان و چې د امریکايي اشغال له پیله یې د هغوي په ملاتړ د طالبانو په کلکه مقابله کوله او څو ځله په دې مقابله کې مرګوني ټپي شو.

نوموړی د هیواد په کچه یو له هغو مهمو پوځي مهرو څخه ګڼل کیږي چې وژل کیدل یې د هیواد په پوځې معادلې کې محوري بدلون راوستلای شي.

په تیره په داسې وضعیت کې چې ګډ حکومت له یوې خوا په پوځي ډګر کې د طالبانو تر سختو بریدونو لاندې دی او له بلې خوا په سیاسي ډګر کې د امریکایانو له نظره لویدلي دی.

په دغسي یوه فوق العاده بحراني وضعیت کې ګډ حکومت د پارلماني ګډوډو ټاکنو تر سره کول د ځان د مشروعیت او موفقیت یوه وسیله بلله ، خو تر هغو وړاندې په هلمند کې د جبار قهرمان او په تعقیب یې د رازق خان وژنه هغه څه دي چې د طالبانو د احتمالي بریدونو په مخنیوي کې د دولتي ځواکونو وړتیا په مطلق ډول تر سیوري لاندې راولي او ښايي دا غیر متوقعې مهمې پوځې پیښې په مجموع کې د ټاکنیزې پروسې د ځنډ او لا ناکامي لامل وګرځي.

په هرصورت د جنرال رازق په وژلو سره طالبان وتوانیدل چې په افغانستان کې د امریکايي اشغال وروستي سرسخت مدافع هم له مخه لیري کړي.

هغوی تر دې وړاندې په شمال کې د جنرال داود داود ، په ختیځ کې د عبدالله لغماني، په جنوب کې د مطیع الله خان ، او په جنوب ختیځ کې د قومندان عزیزالله په وژلو سره د امریکايي حمایت مقاومتي جبهه تر ډیره کمزوري کړې وه ، خو د جنرال رازق په وژل کیدو سره داسې ښکاري چې نور طالبان وتوانیدل ټول هغه کسان چې په شعوري لحاظ یې د امریکايي اشغال ملاتړي و د هیواد له پوځي ساحې څخه حذف کړي.

د کندهار پرونۍ پیښه له شکه پرته چې د هیواد په روان حساس وضعیت کې یوه فوق العاده استثنايي پیښه ده چې حتما به یې د هیواد په سیاسي او پوځي معادلاتو باندې اغیز هم فوق العاده استثنايي وي ، ځکه په یاده پیښه کې طالبان وتوانیدل په یوه ورځ کې د کندار ولایت د ټول لیډرشیپ او په هغوی کې د امریکايي ځواکونو تر ټولو د اعتماد وړکس جنرال رازق په یوه تکتیکي برید کې له منځه یوسي.

سرچینه: نن ټکی اسیا