خبرونه

ناټو د اوږدې چوپتیا وروسته د څلورو امریکایانو ټپي کېدل ومنل

نن ټکی اسيا (سه شنبه، ۲۳ لړم ۱۳۹۶): په هغه چاودنه کې چې تېره دوشنبه په کندهار ښار کې پر بهرنیو ځواکونو وشوه، له امله یې د ناټو په وینا ۴ تنه امریکايي عسکر ټپيان شوي دي.

ددې تر مخه ناټو د پيښې په اړه ویلي وه چې د چاودنې خبر ورته رسیدلی او دوی یې پلټنې پیل کړي دي، خو د کندهار یوه جګپوړي چارواکي رسنیو ته ویلي وه چې چاودنه د روماني عسکرو پر کاروان شوې چې له امله یې پنځه تنه روماني عسکر ټپيان شوي دي.

په کابل کې د ناټو د بشپړ ملاتړ ماموریت په یوه خبرپاڼه کې وویل چې د کندهار په وخت دوه بجې ماپښين ددوی پر ځواکونو موټر بم برید وشو چې له امله یې څلور تنه امریکايي عسکر ټپيان شول. د خبرپاڼې سره سم ټپي شوي عسکر تر تداوي لاندي دي او روغتیايي وضعیت یې د ډاډ وړ دی.

د کندهار د والي ویاند قدرت الله خوشبخت ویلي وه چې پېښه په ډنډ ولسوالۍ کې را منځته شوې.

د طالبانو ویاند قاري یوسف چې د پيښې سمدستي وروسته یې مسؤولیت په غاړه واخیست او رسنیو ته په لیږلي خبرپاڼه کې یې وویل چې ددوی یوه تن سرتیري بریدګر د بهرنیانو پر پوځي کاروان د موټربم په واسطه چاودنه وکړه چې له امله یې دوه ټانګونه ویجاړ او ۱۴ بهرني عسکر وژل شوي دي.

باید وویل شي چې که څه هم د هیواد په مختلفو برخو کې بمبارۍ زیاتي شوې او د ټرمپ نوې پالیسي له مخې په افغانستان کې د اضافي عسکرو خبرونه هم ورکول شوي خو اوس هم په کندهار، هلمند، فراه او ځینو نورو ولایتونو کې د طالبانو له لوري خونړي بریدونه کیږي او هره ورځ په لسګونو دولتي عسکر وژل کیږي.

بلخوا د کورنیو چارو د سرپرست وزیر په وینا د طالبانو بریدونه که زیات شوي دي نو تلفات یې هم ورسره زیات شوي دي چې طالبان تل انکار ځیني کوي او خپل تلفات تر دولتي تلفاتو کم ښيي.


سرچینه: نن ټکی اسیا

Tags

Add Comment

Click here to post a comment

This site uses Akismet to reduce spam. Learn how your comment data is processed.

%d bloggers like this:
/* ]]> */