افغانستان

د ولسي جرګې د ټاکنو نه څارنه به ټاکنو ته قانوني او ټولنیز زیان واړوي

(اریانا نیوز):

د ټاکنو څارونکي بنسټونه وایي، چې د څارونکیو لخوا د ولسي جرګې د ټاکنو نه څارنه به دغه بهیر ته قانوني او ټولنیز زیان واړوي.

که څه هم تر اوسه د رای شمېرلو بهیر روان دی او په دې اړه دا ډول خبرې له وخت مخکې دي.؛ خو ځینې نوماندان د خپلو څارونکیو د معلوماتو په پربنسټ ځانونه ګټونکي یادوي.

د ټاکنو خپلواک کمیسیون کمیشنرحفیظ الله هاشمي وایي، د ټاکنو له پایلو مخکې د نوماندانو لخوا د بریالیتوب اعلان خیالي خبرې دي.

هغه زیاتوي؛ یوازې په کابل کې ۸۰۲ او په ټول افغانستان کې ۲۵۵۶ نوماندان لرو، چې دا ټول ڼانونه بریالي ګڼي.

د ټاکنو څارونکي بنسټونه وایي، د څارونکیو لخوا نوماندانو ته ناسم معلومات ټاکنیزه درغلي ده او دا بهیر به له ننګونو سره مخ کړي.

د افغانستان د آزادو او عادلانه ټاکنو د بنسټ اجرائیه رییس یوسف رشید وایي: دغه آوازې ټاکنیزې سرغړونې دي؛ ناظران د باور د تر لاسه کولو لپاره نوماندانو ته معلومات ورکوي.         

مدني فعالان وایي، کاندیدان؛ ځکه ځانونه ګټونکي بولي، چې د رای ورکولو پر مهال یې د خلکو ګڼه ګوڼه لیدلې ده.

مدني فعال سمیع دره یي وایي؛ دا دلیل کیدی نشي، چې په ټاکنو کې د خلکو ګڼه ګوڼه وه؛ نوماندانو به د بریالي کیدو فکر کړی وي.                 

ځینې باوري دي، چې د ولسي جرګې ټاکنو ته د نومانده کیدو شرایط آسان ولیدل او زیات کسان وتوانیدل، چې ځانونه نوماند کړي.

د ولسي جرګې د ټاکنو نوماند هاشمي وایي، چې د نوماندۍ لپاره معیارونه ډېر ټیټ ول؛ هر چا په آسانه ځان نوماند کړ.      

د مهالوېش له مخې؛ ټاکل شوې د ولسي جرګې د ټاکنو لومړنۍ پایله د لړم میاشتې پر نولسمه نېټه اعلام شي؛ خو باور کیږي، چې اوسنیو ستونزو ته په کتو به ممکن د ټاکنو د پایلو اعلام وځنډیږي.