لوبې

کرېکټ: پاکستان د دولسو پرلپسې ماتو تنده بالاخره په بریا ماته کړه

نن ټکی اسیا (شنبه، ۱۹ لړم، ۱۳۹۷ل): د پاکستان کرېکټ ملي لوبډلې بالاخره د نیوزېلنډ پر وړاندې په یو ورځنۍ سیالیو کې د دولسو پرلپسې ماتو وروسته بریا خپله کړه.

دغه سیالۍ چې تېره شپه د نومبر په نهمه ترسره شوه، د پاکستان لخوا شاهین افریدي او فخر زمان په بریا کې مهم رول ولوباوه.

لومړی توپوهنه د نیوزېلنډ لوبډلې وکړه چې په ټولو اورونو لوبولو سره د روس ټیلر په زړه پورې توپوهنې د ۹ لوبغاړو په سوځېدلو ۲۰۹ منډې جوړې کړې او پاکستان لوبډلې ته یې د ۲۱۰ منډو کم هدف وټاکه، روس ټیلر ۸۶ ناسوځېدلې منډې جوړې کړې، د پاکستان لخوا شاهین افریدي ۴ لوبغاړي وسوځول.

په ځواب کې پاکستان لوبډلې ښه او ګټونکی پېل وکړ، د امام الحق له ټپي کېدو وروسته بابر اعظم فخر زمان سره غوره ملګرتیا وکړه، فخر زمان د ۸۸ منډو جوړولو وروسته وسوځېد، د نیوزېلنډ لخوا فرګوسن ۳ ویکټې واخیستې.

په پای کې پاکستان لوبډلې ټاکلی هدف د ۶ ویکټو په توپیر په ۴۰.۳ اورونو کې پوره کړ او د تېرو دولسو ماتو پرلپسېوالی یې له منځ ویوړ، ځکه چې د دواړو لوبډلو ترمنځ له پرونۍ لوبې وړاندې په ۱۲ سیالیو کې نیوزېلنډ دولس بریاوې خپلې کړې وې.

د دواړو لوبډلو ترمنځ د یو ورځنیو سیالیو سیریز یو-یو مساوي شو، له دې وروسته به درېیمه سیالۍ په دوبۍ او له هغې وروسته به د درې ټیسټ سیالیو سیریز پېل کړي.

دا متن د نن ټکی اسیا څخه کاپي شوی. اصل مطلب دلته موندلای شئ: کرېکټ: پاکستان د دولسو پرلپسې ماتو تنده بالاخره په بریا ماته کړه

سرچینه: نن ټکی اسیا