د کندهار په نېش ولسوالۍ د وسله والو طالبانو بريد په شا تمبول شوی

وسله والو طالبانو تېره شپه د کندهار پر شمالي ولسوالۍ نېش له څلورو خواوو بريد کړی دی.

د کندهار د امنيه قومندانۍ مرستیال ویاند مطیع الله هلال کلید ته وویل، چې د دولت وسله والو مخالفینو تېره شپه نهه بجې د نېش پر ولسوالۍ برید کړی او د برید سره هم مهاله هوایي ځواک په نېش کې د مېشتو ځواکونو مرسته کړې چې په دغو هوايي بريدونو کې ۴۳ وسله وال وژل شوي دي او شل نور ټپيان دي.

د هلال په خبره، د هوايي برید پر مهال د وسله‌والو ګڼ موټرونه او موټرسایکلونه تخریب شوي او ګڼ شمېر وسلې او مهمات يې د امنيتي ځواکونو لاسته ورغلي.

د کندهار د امنیتي چارواکو په خبره، سيمه اوس مهال په بشپړ ډول د افغان ځواکونو په لاس کې ده او د تښتېدلو وسله والو د نيولو په هدف پلټونکي عمليات پيل شوي دي.

د کندهار د امنيه قومندانۍ مرستيال ویاند همدا راز زیاته کړه چي تېره ورځ د کندهار ولایت په میوند ولسوالۍ کې د وسلوالو له لوري د یوه ښخ کړل شوي ماین د چاودنې له کبله یو ملکي وګړی ټپي شوی دی.

هلال زياتوي، یاده پېښه تېره ورځ لس بجې د میوند ولسوالۍ د ګرمابک په سیمه کې رامنځته شوې ده.
وسله والو طالبانو تر دې مهاله ددې پېښو په تړاو څه نه دي ويلي.

The post د کندهار په نېش ولسوالۍ د وسله والو طالبانو بريد په شا تمبول شوی appeared first on pashto.


سرچینه: کلید راډیو

x

Check Also

ننګرهار كې د هيرويينو دوه فابريكې له منځه وړل شوي

(کلید راډیو): د ننګرهار پوليس وايي، د کورنيو چارو وزارت اړوند د ...