افغانستان

چارواکي وايي، فراه کې يې د طالبانو پرضد عمليات پيل کړي

نن ټکی اسیا (سه شنبه، ۲۴ سلواغې، ۱۳۹۶ل): د فراه امنيتي مسوولين وايي، په دغې ولايت کې يې نن سهار د طالبانو پر ضد ګډ عمليات پيل کړي دي.

د فراه د امنيې قوماندانۍ وياند اقبال باهر وايي، په دغې عملياتو کې پوليس، ملي اردو او ملي امنيت ځواکونه ګډون لري.

د باهر په خبره، تر دې دمه په پشترود ولسوالۍ کې څو کلي له طالبانو نيول شوي او امنيتي ځواکونه د پرمختګ په حال کې دي.

تر اوسه پورې د طالبانو او دولتي ځواکونو تر منځ د نښتو راپورونه نه دي ورکول شوي، خو د طالبانو له لوري رسنيو ته په لېږلې خبرپاڼه کې راغلي چې نن سهار يې د عملياتي قوې يو ټانګ په ځمکه کې د خښ شوي ماين په واسطه الوزولی، ټانګ په مکمله توګه ويجاړ او پکې دوه تنه عسکر وژل شوي، دوه نور ټپيان دي.

امنيتي چارواکي په داسې حال کې د عملياتو د پيل خبر ورکوي، چې څه موده مخکې د فراه ولايت معاون محمد يونس رسولي د دغې ولايت د احمتالي سقوط خبرداری ورکړی و.

د راپورونو له مخې، د فراه ولايت ډېره برخه د طالبانو تر واک لاندې ده او اوس مهال طالبان د والي د دفتر په څو کيلو مترۍ کې فعاليت کوي او وخت ناوخت په دولتي پوځي مرکزونو بريدونه کوي.

د يادونې ده، چې وړمه ورځ د فراه نوي ټاکل شوي والي عبدالبصير سالنګي په دې اعتراف وکړ چې د فراه ولايت په زياته برخه خاوره طالبان واکمن دي او په دې ولايت کې د ميشتو امريکايي ځواکونو له قومندان جنرال کري سره يې د لېدنې په ترڅ کې په جګړو کې د لا زياتې همکارۍ غوښتنه وکړه.

جنرال کري هم له والي سره د هر اړخيزې همکارۍ ژمنه وکړه او په خبره يې چې له دې وروسته به زياته پاملرنه هوايي بريدونو ته واړوي.

په هدې وروستيو کې د  بهرنيو ځواکونو له زياتېدونکو عملياتو سره د ملکي خلکو په مرګ ژوبله کې هم زياتوالی راغلی دی.

د امريکايانو په ګډون شاوخوا درې سوه ناټو ځواکونه د فراه په هوايي ډګر کې ميشت دي او وخت ناوخت په ځينو شپنيو عملياتو او هوايي بريدونو کې برخه اخلي.

وړمه ورځ طالبانو په يوه خبرپاڼه کې ويلي و، د فراه په هوايي ډګر يې دوه توغندي وار کړل، چې په میلمستون ولګېدل او په ترڅ کې يې اووه ایټالوي عسکر ووژل شول او دوه تنه نور ټپيان شول.


سرچینه: نن ټکی اسیا

Add Comment

Click here to post a comment

This site uses Akismet to reduce spam. Learn how your comment data is processed.