نظر او تحلیل

ولسمشره! ملکي وګړي ستا په امر وژل کېږي!!

ليکوال: غورځنګ

د امریکا او طالبانو تر منځ د مذاکراتو له پيل څخه راوروسته تر اوسه پورې د ملکي وګړو وژل څو چنده زیات شوي دي، دا د له دې کبله  چې که له طالبانو سره مذاکرات کامياب شي او امریکايان له هېواده ووځي نو نړيوال به دا سوله يا مذاکرات په دې نه تعبيروي چې ګواکې امریکايانو په بريالي ډول له افغانستان څخه وځي بلکې د دې معنی لري چې امريکايانو او نورو غربي هېوادونو د افغان ولس پر وړاندې ماتې وخوړه، همداشان که چېرته امریکايان ووځي نو له ولسمشر اشرف غني سره به هو به هو د ډاکټر نجيب په څېر معامله کېږي نو د دې لپاره چې ولسمشر په خپل زړه کې د ملکي خلګو د وژلو ارمان نه وي برېښی ځکه يې نو له امريکايي ځواکونو سره  اوږه په اوږه د ملکي خلکو وژلو ته ادامه ورکړې.

همداشان ولسمشر غني دا هڅه هم کوي چې ګواکې د افغانستان جګړه به   د ملکي خلکو په بې درېغه وژلو مهار کړي، خو په دې به يې شايد سر نه وي خلاص چې تدبير يې ناکام دی او دا ځکه چې د ملکي خلکو په وژلو جګړه نوره هم تودېږي.

اوس راځو دې ته چې افغان ولسمشر نن يوه دولتي غونډه په دې خاطر رابللې چې د ملکي تلفاتو د مخنيوي غورې دربې ورسره وکړي او وپلټي چې ولې ولسي خلکو ته مرګ ژوبله اوړي؟ په دې ليکنه کې به مونږ هغه څه وليکو کوم چې په دې دلالت کوي چې ولسي مرګ ژوبله د ولسمشر په امر رامنځته کېږي.

ولسمشره!

که تا نننۍ غونډه په ريښتيا د ملکي وګړو د تلفاتو د مخنيو په پار رابللې وي نو ولې خپلو ځانګړو ځواکونو ته د شپنيو چاپو امر کوې؟

ولې خپلو ځواکونو ته امر نه کړې چې ولسي وګړي او طالبان سره تفکيک کړي؟ خو له دې معلومېږي چې اصلاً ستا په جوړه کړای شوې اردو، ځانګړو ځواکونو، پوليسو او نورو قطعاتو کې داسې څوک نشته چې ملکي وګړي او مخالفين سره وپېژني، په اصل کې دا ستا د ادارې په ضعف دلالت کوي.

ولسمشره!!

شايد ته فکر کوې چې ګواکې د ولسي وګړو په بې درېغه وژلو به له نړيوالو څخه کوم مډال تر لاسه کړم، خو بايد سوچ وکړې او تاریخ ته نظر وکړې چې د بل تر امر لاندې د خپل ولس وژونکې څېرې د هر چا په سترګو کې اغزی وي او د هر چا ورڅخه بد راځي ان دا چې د کوم چا په امر چې ولسي وګړي او خپل ولس وژني؛ هغه هم ورته د ذلالت په نظر ګوري.

ولسمشره!!

ستا په دې ډول کړنو باندې د اډولف هټلر (جرمنی ځواکمن قومندان) خبره راپه ياد شي، چې يوه ژورنالست ورڅخه وپوښتل چې په ژوند کې تر ټولو له چا بد راځي؟

اډولف هټلر ورته وويل: چې په ژوند کې مې هغه څوک بد راڅي، کوم څوک چې له ما سره د خپل هېواد په نيولو کې مرسته وکړي او خپل ولسي وګړي په يرغلګرو ځواکونو ووژني. يا هم خپل ولس د بل د ګټو لپاره وژني.

ولسمشره!!

څه فکر کوې؟ نن چې کومه غونډه د ولسي وګړو د مرګ ژوبلې د مخنيوي لپاره رابلې، دا ولسي وګړي د چا په امر وژل کېږي؟ آیا دا ستا امر نه دی؟

ولسمشره!!

د خپل ولس مدرسې د چا په امر بمبارد شوې؟ که ته وايې چې دا بمبارد مونږ نه کوو، بلکې امريکايي ځواکونه يې کوي. خو دا دې ياد دي چې له بريد وروسته چې کله ژورنالستان د امريکايي ځواکونو له وياندانو څخه پوښتنه وکړي چې ولې په افغانستان کې ملکي تلفات اړوئ؟ نو دوی ورته وايي چې مونږ هر کار د افغان دولت په غوښتنه کوو.

ولسمشره! د افغان دولت په رأس کې څوک دی؟ ايا ته د  افغان دولت ولسمشر نه يې؟

د امریکايي ځواکونو په دا ډول ادعاوو (چې هر وخت وايي چې بمبار مو د افغان دولت په غوښتنه کړی) تا کله هم سوچ کړی دی؟ کله دې هم داسې ويلي چې امریکايانو څخه د بمبارد غوښتنه کوم افغان دولت کوي؟

ولسمشره!!

دا چې د نړۍ په ګوټ ګوټ کې دا قانون شته، کله چې د کوم هېواد پوځيانو د خپل دښمن په خلاف په کومه سیمه کې عمليات کوي، پوځي مشران ورته لارښوونه کوي، چې يوازې د جګړې عاملين په نښه کړئ! بل هيچا ته هم بايد تاوان ونه رسوئ!

تا کله هم خپلو ځواکونو ته داسې لارښوونه کړې؟ يا کله چې دې ځواکونه له جګړې يا شپنيو چاپو څخه بېرته راستانه شي، دا دې ورڅخه پوښتلي چې څوک مو ووژل؟ يا مو څه لاسته راوړنې ولرلې؟

ولسمشره!!

په دې خو اوس ټول ولس پوه شوی دی چې بمبارونه، شپنۍ چاپې، وحشتونه، ظلمونه، د بې ګناه وګړو بنديانول او دې ته ورته نورې کړنې ستا او ستا د دولت د نورو مشرانو په امر تر سره کېږي. نو اوس که  ته چېرته له خپل ولس نه په ائينده انتخاباتو کې د خپلې کاميابۍ هيله لرې، نو دا به ته څنګه ارزوې؟

ايا ستا د مفکرتوب همدا پايله وه چې خپل ولس اول وژنه او بيا ورڅخه انتخابات او ټولټاکنې هم غواړه؟ ايا تا ته لاسته راوړنې او پرمختګ بولې؟ ستا دا ډول کړنې د نړۍ په کوم قانون کې شتون لري؟

دا مطلب د کابل ټکی کام څخه کاپي شوی:ااصلي مطلب دلته موندلائ شئ: ولسمشره! ملکي وګړي ستا په امر وژل کېږي!!.

سرچینه: کابل ټکی کام

%d bloggers like this: