لوبې

د شپږیزو پاچا د ویسټ انډیز مرستیال لوبډلمشر شو

د ویسټ انډیز کرکټ بورډ په یوه تازه پریکړه کې د شپږیزو پاچا او د کرکټ پیاوړی لوبغاړی کرېس ګېل، د خپل ټیم مرستیال لوبډلمشر وټاکه.

کرېس ګېل چې د ویسټ انډیز لوبډلې او نورو سوداګریزو لیګونو کې په خپل چټک اوپننګ او هسکو شپږیزو د لوبډلو ملا ورتړي اوس د لوبډلې مرستیالي لوبډلمشري واخېسته او ښایي نړیوال جام لوبډله ښه وځلوي.

نوموړی د ویسټ انډیز په اوسنیو لوبغاړو کې تر ټولو مشر او تجربو څښتن لوبغاړی دی او په نړیوالو لوبو کې ویسټ انډیز لپاره ډېر ځلېدلی هم دی.

کرېس ګېل او د ویسټ انډیز لپاره یې لوبې
هغه چې ۳۹ کاله عمر لري، دا مهال د ویسټ انډیز په لوبډله کې تر ټولو مجرب لوبغاړی بلل کېږي، نوموړي د ویسټ انډیز لپاره ۱۰۳ ټېسټ لوبې، ۲۸۹ یو ورځنۍ لوبې او ۵۸ شل اوریزې لوبې کړي دي.

هغه په دغو درې واړو ډولونو لوبو کې ۱۸ زره ۹۹۲ منډې کړي دي.

کرېسټوفر هېنري ګېل په درې واړو فارمټونو کې په ۹۰ لوبو کې د ویسټ انډیز لپاره لوبډلمشري هم کړې ده.

کرېس ګېل په داسې حال کې وایس کېپټن یا مرستیال لوبډلمشر وټاکل شو، چې نوموړی د وروستي ځل لپاره یو ورځنۍ لوبې کوي او له دې جام وروسته له یو ورځنیو لوبو سره مخه ښه کوي.

هغه به په دې نړیوال جام کې د الراونډر جېسن هولډر په لوبډلمشرۍ کې ولوبېږي او مرستیالي به هم وکړي.

کرېس ګېل ویلي:

«چې دا زما لپاره د خوښۍ ځای دی، چې ما باندې ویسټ انډیزیان باور کوي او په هر ډول لوبو کې ما د لوبغاړو نوملړ کې شاملوي او زه باید د یو مشر لوبغاړي په توګه ذمه واري پرځای کړم.»

ګېل او ۲۰۱۹ کال آې پي ایل


کرېس ګېل سږ کال د پنجاب لوبډلې لپاره ولوبېد، هغه په ۱۳ لوبو کې د پنجاب لپاره ۴۹۰ منډې وکړې، ۱۵۳ اعشاریه ۶۰ سټرایک رېټ دی او په منډو کې پنځم ځای کې دی.

سږ کال آې پي ایل کې رسل پسې دوهم نمبر توپ وهونکی دی، چې دېرې شپږیزې یې وهلي دي، رسل ۵۲ شپږیزې جوړې کړي او ګېل بیا ۳۴ شپږیزې وهلي دي.

کرېس ګېل د آې پي ایل له امله د ویسټ انډیز، ایرلېنډ او بنګله دېش ترمنځ د یو ورځنیو لوبو درې اړخیز سیریز ترک کړ، د ویسټ انډیز لوبډلې د دغې لوبلړۍ کې په لومړۍ لوبه کې په ایرلېنډ ریکارډ جوړ کړ او په ۱۹۶ منډو یې ایرلېنډ ته ماته ورکړه.

نن دوه نیمې بجې بنګله دېش او ویسټ انډیز دکرېس ګېل په نشتون کې د درې اړخیز سیریز دوهمه لوبه کوي.

دې سیریز کې ټولې ۷ لوبې دي او د می په ۱۷ مه نېټه د جمعې په ورځ پای ته رسېږي.

سرچینه: یاران

%d bloggers like this:
/* ]]> */