افغانستان

اوس له پاکستان سره پر دیورند کرښې د خبرو وخت ندی- د سرحدونو وزارت

د سرحدونو او قبایلو وزارت مسوولینو ویلي، چې اوس له پاکستان سره پر دیورند کرښې د خبرو وخت ندی.

د هېواد په ختیځ کې غزیدلې دیورند کرښه، چې له کلونو– کلونو راپدیخوا پرې افغانان او پاکستانیان وران دي؛ پاکستانیان یې حل شوې مساله ګڼي، خو افغانان یې فرضي کرښه بولي.

د سرحدونو او قومونو چارو وزیر دا خبرې وروسته له هغې کړي، چې د جمعیت اسلامي ګوند اجرائیه رییس عطامحمد نور تېره ورځ د پاکستان د پنجاب ایالت د لاهور د مري د سولې په ناسته کې ویلي وه، چې د افغانستان د اوبو پر وېش، ترانزیت او دیورند کرښې دې ټولپوښتنه ترسره شي.

سرحدونو چارو وزیر عبدلوحید خاورې دې خبرې په غصه کړی او وایي؛ دیورند تر هغې ستره مساله ده ، چې پر دغو وړو خولو یادیږي؛ ځکه، چې حکومتونه د دې خبرې صلاحیت نلري.

د نوموړي په وینا، دا د حکومتونو او افرادو واک ندی، چې پر دیورند کرښې خبرې وکړي، بلکې په وینا یې باید د دواړو لوریو ولسونه په دې اړه پرېکړه وکړي.

د نوموړي د څرګندونو له مخې ټولپوښتنه هغه وخت تر سره کیدی شي، چې په هېواد کې امن وي؛ اوس پاکستان هم ناامنه دی.

افغانستان کله هم دیورند کرښه پر رسمیت نده پېژندلې؛ خو پاکستان یې حل شوې مساله یادوي.

د نړیوالو اړیکو کارپوه سید نوید امیري وایي، چې لومړی باید د افغانستان د سولې سکالو(موضوع) روښانه او وروسته بیا پر دیورند کرښې خبرې وشي. د پاکستان او افغانستان خلک دواړه پوهیږي، چې د دیورند کرې لر او بر سیمې د چا دي!

مخکې لدې پخواني ولسمشر حامد کرزي د خپل حکومت پر مهال ویلي وه، چې که د افغانستان – پاکستان سرحدي لانجې د دیورند کرښې د په رسمیت پېژندلو لپاره وي؛ نو دا کرښه به دمګړۍ رسمیت ونه مومي.

Tags
%d bloggers like this: