اشرف غني د کوندوز دشت ارچي بمبار په اړه بخښنه غوښتې

(کابل ټکی کام):

(کابل ټکی کام، ۱۳۹۷، غویی ۲۶) د ګډ حکومت مشر اشرف غني نن له غرمې مخکې د کندوز په پېښه کې د قربانيانو له خپلوانو او قريبانو سره وکتل او افغان ځواکونو له لوري پر هغوی د شوې بمبارۍ له کبله يې ترې بخښنه وغوښته.

د کندوز یو شمير مشرانو او د يادې پېښې د کورنيو غړو، له ولسمشر غني غوښتنه وکړه چې په راتلونکي کې د دغه ډول پېښو مخه ونيول شوي او زياته يې کړه چې ” د قربانیانو د کورنیو د تسلیت او د عدالت د تامین لپاره دې له عاملینو سره قانوني چلند وشي.”

که څه هم د کورنيو چارو وزارت د کندوز د دشت ارچي په بمبارۍ کې د ملکيانو وژل کېدل لا هم ردوي خو د ارګ څخه خپره شوې اعلاميه کې د اشرف غني له قوله راغلي، همغه شپه يې په روغتون کې د ټپي ماشومانو له ليدو وروسته  (دفاع وزیر ته په هوایي بریدونو کې د لا دقت او د دغه وړ پېښو د مخنیوي لارښوونه وکړه.)

په اعلاميه کې د اشرف غني له خولې ليکل شوي، چې “د افغانستان حکومت او په ځانګړي ډول ملي دفاع وزارت د دغې پېښې له امله د ملکي قربانیانو له کورنیو بښنه غواړي، ځکه د فتنه ګرو او قانوني حکومت توپیر دادی چې قانوني حکومت د ملت په حق کې د شویو تېروتنو له امله بښنه غواړي.”

د روان کال په وري مياشت کې د کندوز په دشت ارچي ولسوالۍ کې افغان ځواکونو د دستاربندۍ په يوې غونډې بمبار وکړ چې له کبله يې له سلو زياتو ملکيانو ته مرګ ژوبله واړوله.

که څه هم ارګ د يادې پېښې د پلټنې او تحقيقاتو لپاره يوه کميټه ټاکلې وه خو تر دې دمه يې خپل راپور رسنيو سره نه دی شريک کړی.

نږدې يوه اوونۍ مخکې، د ملګرو ملتونو د بشر حقونو ادارې يوناما په يوه راپور کې وويل چې د کندوز په دشت ارچي کې د افغان هوايي ځواکونو په بمبارۍ کې ۱۰۷ ملکيانو ته مرګ ژوبله اوښتې چې يواځې ۸۱ تنه پکې ماشومان و.

x

Check Also

ننګرهار كې د هيرويينو دوه فابريكې له منځه وړل شوي

(کلید راډیو): د ننګرهار پوليس وايي، د کورنيو چارو وزارت اړوند د ...